#gujaratipoetry #mygazal

ન ભૂલી શકું તો કહો શું કરું હું ?
ફરીને ફરી યાદ ઢાળે ઢળું હું.

નજર એમની છે નશાની દુકાનો,
ખરીદી નશો બસ નશામાં રહું હું.

ગમો અણગમો શું ? રહું મસ્ત મૌલા,
સનમ છું, નવાબી મિજાજે હસું હું.

ન વાદે વિવાદે, ન ગુસ્સે, પરાણે,
હ્દયના સહજ ભાવ વિશ્વે મળું હું.

ઉમર વેડફી છે અમે તો શરમમાં,
કહાની ન કિસ્સો, કવનમાં વસું હું.

ન આવો અરે ઉર્મિઓ એક સાથે,
દરદ સામટું ક્યાં જઈને રડું હું ?

ધગશના ધખારા ન શમતા હ્દયમાં,
ધખારે ધખારે વધારે બળું હું

તડપ જીંદગીભર પ્રણયના ઝુરાપે
રવાની ભુલી ઓટમાં વિસ્તરું હું.

અમોને ડુબાવ્યા અમારા સહારે,
કહો શેં અવરના ભરોસે તરું હું ?

ન આસાન બચવુ કરમ કાયદાથી
પડે ભોગવા ફળ ન ટાળી શકું હું.
-શર્મિષ્ઠા”શબ્દકલરવ”.