#gujaratigeet #poetry

આજ સખી રે કેસુડાંના ફૂલ મને કંઈ કહેતાં !
વગડાની રે વાટે વાટે ફોરમ થઈને વહેતાં !

બોલાવે એ, આ સરોવરની મહેકંતી પાળીએ…
લલચાવે લહેરાતી એની લાલચટક ડાળીએ…
બાહોંને ફેલાવી મારગ રોકીને કંઈ કહેતાં !

આજ સખી રે કેસુડાંના ફૂલ મને કંઈ કહેતાં !

ધીરેથી ઢોળ્યાં છે એને વગડે એના રંગ..
બદલાયાં છે સખી રે મારા નિતનવા આ ઢંગ..
કાન દઈ સાંભળ ફાગણ ફાગ બની કંઈ કહેતાં.

આજ સખી રે કેસુડાંના ફૂલ મને કંઈ કહેતાં !

એના ઉન્માદે હું તો થનથન થનથન નાચું…
ફોરમ રે નશીલી એની લથબથ લથબથ લાજું..
રંગે બોળી, જાણે એ મદમાતા થઈ ને કહેતાં !

આજ સખી રે કેસુડાંના ફૂલ મને કંઈ કહેતાં !

_’શર્મિષ્ઠાશબ્દકલરવ”.

•