#preyar #harharmahadev #shivay

હે પ્રભુ!
તારું અસ્તિત્વ તો અત્ર તત્ર સર્વત્ર વ્યાપ્ત છે.
એમ દુન્વયી રીતે તને શોધવું એ કસ્તુરી મૃગનું
કસ્તુરી શોધવા જેટલું જ મૂશ્કેલ કાર્ય છે.
એથી જ… તારા હોવાપણના એહસાસને મારા હોવાપણામાં
અનુભવી બસ તારી જ મોજમાં મસ્ત રહું હું..
-શર્મિષ્ઠાશબ્દકલરવ.

#gujarati #poetry #gazals

લ્યો હા જી હા તો કરવું પડશે. રાજા થઇ એ ઊભા છે.
વાચિક બાણે કરતા ઘાયલ, ઘા સોટીથીયે ઊંડા છે.

ના સમજે એ પ્રીતી રીતી, માનવતા તો હોયજ ક્યાં?
પૌરુષતાના પોકળ દંભી ક્હે: ખુદને જ્ઞાની, ગુંડા છે.

સમજે એ તો તનને જ સઘળું, દિલ દિલદારી કંઇ જ નૈ.
છળ કરતાં શરમાતા નહીં, મદમત્ત સ્વાર્થ ભરેલાં સૂબા છે.

સહિયારાનો અર્થ ન સમજે, મારું મારું કેવળ મારું.
ભૂલો તો એ ના જ સ્વીકારે, રાવણના રણફૂંકા છે

નિર્બળને દમદાટી રાખે મનફાવે ત્યાં દે ધમકાવી.
શૂરા સમજી રાચે સ્વર્ગે! પણ નર્કે ખોડ્યા ખૂંટા છે.

-“શર્મિષ્ઠાશબ્દકલરવ”.

#gujarati #poetry #gazals #rain #mousam

ભરપુર થઇ ભીંજાવાની આવી છે મૌસમ.
કિસ્સો થઇ ચર્ચાવાની આવી છે મૌસમ.

કોરી ગાગર ને ઝરમર સપનાની ફોરમ,
છલ્લોછલ છલકાવાની આવી છે મૌસમ.

ભીંજવવી ગરમીને આ ઝમ-ઝમ વરસાદે,
મીઠી સોડમ રેલવવાની આવી છે મૌસમ.

શ્રાવણ ભાદરવો કંઇ વરસે ને ગરજે કે,
આ ખુદને વરસાવાની આવી છે મૌસમ.

મનભાવન સ્મરણોને ભીના ઝમકોળી લો
ચાહત થઇ પાંગરવાની આવી છે મૌસમ.
-“શર્મિષ્ઠાશબ્દકલરવ”.

#gujarati #poetry #gazals

સાવ કાચું દોરડું છે જાણ છે ને?
વીતશે જીવન તમાશે જાણ છે ને?

ખેલ એનો દોર એનો ને સમય પણ..
નાચ તારો, એ નચાવે જાણછે ને?

કેટલા બાકી છે શ્વાસો તું ન જાણે,
માપવું કે માણવું એ જાણ છે ને?

દર્દ ગણવામાં સમય વીતી જશે તો,
સુખ રિસાઈ દૂર જાશે જાણ છે ને?

તું છુપાવે એક ચ્હેરો લાખ મ્હોરે,
કર્મથી તું ઓળખાશે, જાણ છે ને ?

મોહ માયા ને મમતના ધમપછાડા,
અંતને મૂશ્કેલ કરશે, જાણ છે ને?
-“શર્મિષ્ઠાશબ્દકલરવ”.

#gujaratigeet #poetry

Watch on: https://youtu.be/FyKu1ZQWUYI

જુગજુગના પ્રેમને સંમોહી કાનાએ
હળવે આકારી’તી રાધા..
યમુનાની રેત પછી ભીની સંકોરી કાને
હળવે કંડારી’તી રાધા..

હરણાની ભોળપને મોરલાની રાગિણી
અંગેઅંગ ભરી કાને મસ્તીભરી મોહિની
રસભરી નેહઝરતી નજરો ઝુકાવી પછી
હળવે મલકાઈતી રાધા..
જુગજુગના પ્રેમને સંમોહી કાનાએ
હળવે આકારી’તી રાધા..

પંખીઓની ચહેક ભરી વેણુંની ફૂંકમા
હળવે રહી ધરી કાને રાધાના મુખમાં
સ્નેહભરી મધઝરતી વાણી ઘોળીને પછી
હળવે આલાપી’તી રાધા…
જુગજુગના પ્રેમને સંમોહી કાનાએ
હળવે આકારી’તી રાધા..

કાનાએ દલડાને બાંટ્યુ બે ભાગમાં
અરધું પોતામાં, અરધું રાધાનાં હાડમાં
વ્હાલ થકી મ્હેકંતા શ્વાસોને ઘૂંટયા’તા
તેથી મીન સમ તડપતી’તી રાધા…

જુગજુગના પ્રેમને સંમોહી કાનાએ
હળવે આકારી’તી રાધા..
-“શર્મિષ્ઠાશબ્દકલરવ”.

#gujarati #poetry #songs #gujaratigeet

એક મુખડા પરથી અલગ અલગ ભાવ સાથે બે ગીતો:
1
મતવાળી ઘનઘોર ઘટાઓ લળી લળીને વરસે.
મનજી મારું તોય હજી કંઇ કોરું કોરું તરસે.

રણઝણ રણઝણ તાર છંછેડી પ્રણયનાદે ડોલ્યુ.
અલક મલકની વાટ મેલીને વિરહની વાટે મોહ્યુ
સપનાઓની આડશ લઈને હકીકતોથી ઝઘડે.
મનજી મારું તોય હજી કંઇ કોરું કોરું તરસે!

ચારમાસ ક્યાં રોજે વરસે ઝળુંબાતી વાદલડી?
બારેમાસે છાનીછપની વહેતી રહે આંખલડી.
યાદોના તણખા રોપીને ઊનું ઊનું ફણગે.
મનજી મારું તોયે હજી કંઇ કોરું કોરું તરસે.

મતવાળી ઘનઘોર ઘટાઓ લળી લળીને વરસે.
મનજી મારું તોયે હજી કંઇ કોરું કોરું તરસે.
-“શર્મિષ્ઠાશબ્દકલરવ”.
2
મતવાળી ઘનઘોર ઘટાઓ લળી લળીને વરસે.
મનજી મારું તોયે હજી કંઇ કોરું કોરું તરસે

રણઝણ રણઝણ તાર છોડીને નાદબહ્મમાં ડોલ્યુ.
અલક મલકની વાટ મેલીને અલખની વાટે મોહ્યુ
સંતૂરી સૂર રેલાવી તન એકતારા જેમ હરખે .
મનજી મારું તોયે હજી કંઇ કોરું કોરું તરસે.

વરસોના વહાણા વાયા ને બેઠું એજ ઝરોખે
સાતે દ્વારો વાખી ભીતર અજવાળું સંકોરે.
શિવ શિવની રટણા રટતા ધીમું ધીમું વલખે.
મનજી મારું તોયે હજી કંઇ કોરું કોરું તરસે.

મતવાળી ઘનઘોર ઘટાઓ લળી લળીને વરસે.
મનજી મારું તોયે હજી કંઇ કોરું કોરું તરસે
-“શર્મિષ્ઠાશબ્દકલરવ”.